Durangoko Surrandien konpartsak 25 urte betetzen ditu aurten
DURANGO | Ate joka ditugu karnabalak, gainean ditugu, hori dela eta Kriskitin taldeko dantzari eta laguntzaileok hasi dira motorrak berotzen. Aurton Surrandien konpartsak 25 urte betetzen ditu, beraz ekarpen berezi bat egin nahi izan dute.
Aurretik zituzten musikei berri bat gehitzea bururatu eta Gasteizko Jose Mari Bastida “Txapi” txistulariari enkargatu zioten. Sasoiz egin du Bastidak bere lana eta urtarrilaren 26an aukeztuko dute berak sortutako Surrandien dantza izeneko musika Durangoko Arte eta Historia Museoan 18:00etan.
Jaizale txistulariek joko dute Bastidaren sorkuntza.
Musika ez eze, dantza edo koreografia ere sortu dute Kriskitin taldeko Oier Sarobe eta Jaione Fernandez Retanak Aritz Lasargurenen laguntzaz.
Aurkezpenaren ondoren Oier Araolaza Arrieta eibartar dantzari eta antropologoak Inauteriak, hartza eta mozorroen neguko festak hitzaldia emango du.
Urtero lez maskara tailerrak antolatu dituzte, urtarrilaren 27an eta otsailaren 4an ordua: 11:00 – 13:00
Dantza tailerra urtarrilaren 27an eta otsailaren 4an. Ordua: 12:00-12:30
Surrandien konpartsa otsailaren 10ean irtengo da kalez kalez hartza lagun duela. 18:00etan.
