Historia ofizialean ageri ez diren historia errealak biltzen ditu web orriak
DURANGO.- Gaur goizean Durango 1936 Kultur Elkarteak sortutako webgune berria aurkeztu du Nazio Batuen Erakundeak Holokaustoaren Biktimen Memoriaren Nazioarteko Eguna legez izendatuta daukan urtarrilaren 27aren bezpera delako.
Aurkezpenean Andoni Barreña eta Iñaki Garaita egon dira Durango 1936 Elkarteko ordezkari bezala eta argi utzi dute web orri berri hau elkarteak dituen helburuei lotuta dagoela, hau da, Errepublikaren, askatasunaren eta Euskal Herriaren nazio-eskubideen alde faxismoari aurre egin zioten Durangaldeko herritarrei omen egiteko, euren borroka gogorra eta sufrimendu latza ezagutarazteko eta zor zaien ohorea aldarrikatzeko gune bat dala.
Hau dala eta, web orri berri honetan elkarteak egindako 75 bideo elkarrizketatatik ataratako materiala eskuragarri egongo da horrela webgunea Ikusentzunezko-banku batean bihurtuz. «75 elkarrizketa horietatik 800 bideo labur baino gehiago egin ditugu, zeinetan biltzen den XX. mendaren zati luzeegi batek Durangaldean eta Durangon utzitako arrasto latzaren testigantza» adierazi dute Durango 1936 Kultur Elkarteko ordezkariek.
Webgunearen edukien editorea Unai Iturriaga da eta bertan ikusentzunezko material horren erabilera ahalik eta errazena izateko bilaketak egiteko hainbat bide proposatzen dira: elkarrizketatuen arabera, gaien arabera, herrien arabera, hildako edo errepresaliatauen arabera…
Web orri hau argitara ematerako orduan Durango 1936 elkartearen helburua 1936ko altxamendu faxistaren ondorioz isilarazitako ahotsei eta bizipenei bozgorailua jartzea da. Historia ofizialean ageri ez diren historia errealak biltzen ditu web orri honek.
