450 ume eta gazte dantzan arituko dira Durangon
DURANGO.- Ohi denez San Faustoko jaiak bukatu ondoren Umeen Euskal Jaia ospatzen da Durangon, beraz, datorren igandean urriaren 29an Tronperri eta Txoritxu Alai dantza taldeek 51. edizioa antolatu dute. Bertan 450 ume eta gazte batuko dira beste 60 arduradunekin batera.
Goizeko 11,30ean kalejira hasiko da eta arratsaldeko 17,00etan alardea ospatuko da Ezkurdiko plazan, euria bada Landakogunean izango da.
Parte hartuko duten taldeen artean Durangoko Tronperri, Txoritxu Alai, Matienako Iluntze, Abadiñoko Talde batuak, Berrizko Iremiñe eta San Lorentzo, Elorrioko Besaide, Mañariko Andra Mari, Otxandioko Urduri, eta Zornotzako Udabarri beste batzuen artean
Dantzen artean Agintariena, Zortzikoa, ezpata txikia, banangoa eta txotxongiloa dantzatuko dute mutilek. Neskek, aldiz, arku dantza, zinta dantza, kontrapas eta sagar dantza. Ume txikiek ere dantzatuko dute esku dantza, San Petrike, Txulalai eta apatain dantza. Bukatzeko Fandangoa eta arin-arina dantzatuko dute partaide guztiek.
