Udalak dagoeneko sinatu du 758 plaka fotovoltaiko jartzeko lanen hasiera
DURANGO | Ima Garrastatxu Durangoko alkate eta EH Bilduren hautagaiak klima aldaketaren aurka egiteko pausoak ematen jarraitzeko beharra azpimarratu du, eta, besteak beste, Durangoko lehen energia kooperatiba sortzea proposatu du. Proiektu horrek, Durangoko Udala dagoeneko egiten ari den beste batzuekin batera (750 plaka fotovoltaiko instalatzea, esaterako) karbono dioxidoaren emisioak murriztea bultzatuko du.
“Energia komunitateen bitartez durangarrek energia garbia eta beste energia-zerbitzu batzuk sortzeko aukera izango dute. Komunitate horiek iturri berriztagarrietatik sortutako energia sortzean oinarritzen dira, baita energia hori hornitzean eta biltegiratzean, kontsumoan eta, hala badagokio, energiazerbitzuen eskaintzan ere”.
Garrastatxuk gogorarazi du Durangoko Udalak dagoeneko sinatu duela Landako II kiroldegiko, Landako eskolako eta Ezkurdi pilotalekuko teilatuetan 758 plaka fotovoltaiko jartzeko lanen hasiera. 343.035 euroko aurrekontuarekin, plaka horiek urtean 340.000 kWh ekoizteko aukera emango dute, eta Udaleko Energia eta Klima Plan onartu berriak markatutako helburuak betetzen lagunduko dute.
Garrastatxuren hitzetan, “Durangon aurrera egin behar dugu aldaketa klimatikoaren aurkako borrokan, eta horretarako erakundeetatik neurriak hartu behar ditugu, herritarrek ere beren aletxoa jar dezaten. Klima aldaketaren arazoa ez da soilik erakundeetara mugatzen, baizik eta erakundeetatik herritarren ekimen kolektiboak ere babestu behar ditugu, eta komunitate energetikoak horren adibide izan daitezke, eskualdeko beste herri batzuetan gertatzen den bezala, Elorrion adibidez”.
Alkateak nabarmendu du garrantzitsua dela durangarrei ere energia berriztagarria sortzeko, erabiltzeko eta kudeatzeko ereduak eskaintzea. Era berean, nabarmendu du horrelako tokiko komunitateak eredu berritzaileak direla gizartearen, ingurumenaren eta ekonomiaren ikuspegitik.
Aldi berean, Garrastatxuk gogorarazi du aurten Udalak apustu erraldoi bat egingo duela energia berriztagarrien sorreran, izan ere, 2023rako Aurrekontuetan 350.000 euroko partida aurreikusi da Landako Guneko teilatuan 416 plaka fotovoltaiko jartzeko.
Plaka horiek lehen aipatutakoei gehituko zaizkie eta urtean 243.000 kWh ekoizteko balioko dute. Horri esker, alde batetik, Landako Gunea bera autohornitu ahal izango da, eta, bestetik, inguruan dauden udal eraikinak energiaz hornitu ahal izango dira.
