Elkarretaratzean EHEko kide Koldo Zaratek irakurri duen idazkian, Plateruena ixtea euskara eta euskal kulturarentzat kezkagarria dela salatu da, euskarak arnasgune erreferentziala eta euskal kulturak azpiegitura oso garrantzitsua galduko dutelako.

Baina gertaera espezifiko horretatik harago, Plateruena ixtea gertatzen ari diren eraldaketa sozial, kultural, teknologiko eta abarren sinboloa dela uste du EHEk. Euskara eta euskaldunon hizkuntza-komunitatea kinka larrian kokatu lezaketen eraldaketak.

Horregatik, elkarretaratzean instituzioei «gure hizkuntza eta kulturaren aldeko neurri estruktural eraginkorrak hartzea» exijitu zaie. Era berean, euskaltzaleei kalera ateratzera dei egin zaie, instituzioak presionatzeko eta herri gisa galbidera garamatzaten joera linguizida eta uniformizatzaileei aurre egiteko.